Sxilénsia Prizidenti di Repúblika, José Maria Neves, ta prizidi es sábadu, 15 di fevreru, através di vídiu, pamodi ki e sta na Santanton, abertura di “Fórun di Língua Matérnu Kabuverdianu 2025”, ki sta ben ser realizadu, li na Palásiu di Platô, na Praia, pa Asosiason di Língua Matérnu Kabuverdianu (ALMA-KV), ku altu patrosíniu di Xefi di Stadu.
Evéntu ta kumesa 8:45, ku abertura, y ta kontinua ti séti óra noti, ku un prugrama riku didikadu a Língua Kabu Verdianu.
Es inisiativa di ALMA–KV sta enkuadradu na kumemorason di Dia Internasional di Língua Matérnu, ki ta asinaladu dia 21 d’es mês y é ten komu fóku perkursu sósiu-stóriku di língua kabuverdianu na 50 anu di indipendénsia nasional.
Obijetivu é prizenta kes últimu kontisimentu ligadu ku keston di língua na país, kes avansu ki konsigidu ti gosi y, pa otu ladu, poi pa dibati mididas ki debi tomadu nes momentu pa kontinuidadi di prusésu, ku atenson spesial na papel di língua na dizenvolvimentu umanu, ikonómiku y sosial.
Duranti um dia interu sta ben sta riunidu n’es fórun, li na sala Beijing di Prizidénsia di Repúblika y através di plataforma digital, oradoris di Kabu Verdi, di Diáspura y di paízis sima Portugal, Giné-Bisau, Mérka, Fransa, Seychelles y Alimanha, entri linguistas e otus spesialistas relasionadu ku es aria, além di prusoris, studantis, diputadus, jornalistas, skritoris, dirijentis, autarkas, organizasons di juventudi y kumunitariu y sidadons. Es ta ben lenbra kaminhu stóriku di língua kabuverdianu, dibati si formason y perkursu di afirmason, riflete, ku bazi na kaminhu fetu y na kontestu sósio-linguístiku konkretu di Kabu Verdi, sobri kaminhus di língua pa futuru.
Es mumentu ta ben sirbi inda pa partilia spiriénsia di nsinu di línguas kriolu na mundu, di ki Kabu Verdi pode tra binifisiu y divulga spiriénsia di nsinu di língua kabuverdianu li na nos tera y kes inisiativa ki sta ta dizenvolvedu gósi.
Ta fazi parti d’es “Fórun di Língua Matérnu Kabuverdianu” um konferénsia Inaugural, fetu pa Jurgen Lang (Alimanha), ku moderason di Amália Lopes, sobri “Perkursu sósiu-stóriku di LKV” y três méza-ridondu pa dibati y faze reflekson di nsinu di língua matérnu y keston relasionadu ku ajénda sosial y pulítiku di língua. (1: “Língua matérnu y dizenvolvimentu umanu”, 2: “Spiriénsias di nsinu di LKV” y 3: “Spiriénsias di instrumentalizason di LKV y di otus língua kriolu”
Di rifiri inda ma es forun é abertu pa públiku, ki podi partisipa, di grasa, prizensialmenti li na Palásiu o virtualmenti através di platafórma Zoom.
Djuntu ku es Nota di Inprénsa sta bai programa kompletu d’es fórum, pa nhos konsiderason.
